Ársfundur Mardallar var haldinn í gær, 13. nóvember á fullu tungli í Nauti. Kjörið var nýtt ráð sem í eiga sæti Anna Dóra Hermannsdóttir, Guðrún Hadda Bjarnadóttir, Hrefna Harðardóttir, Valdís Viðarsdóttir og Valgerður H. Bjarnadóttir sem er í hlutverki Freyju Mardallar.
Þá var kynnt nýtt auðkenni félagsins, sem hér sést, hannað af þeim Örnu Valsdóttur og Sunnu Valgerðardóttur. Þá var rætt um framkvæmd viðburða í tengslum við verkefnið Vitið þér enn - eða hvað? listsýningar, námskeið, uppákomur og alþjóðleg ráðstefna um gyðjumenningu og völvuna í rótum okkar, sem haldið verður 2009 - 2010. Sjá nánar hér á síðunni.
Mardöll, félag um menningararf kvenna hefur hafið undirbúning að röð viðburða frá sumarsólstöðum 2009 - 2010 undir yfirskriftinni Vitið þér enn - eða hvað?
"Skelfur Yggdrasils askr standandi, ymur hið aldna tré, en jötunn losnar; hræðast allir á helvegum, áður Surtar þann sefi of gleypir.
Hvað er með álfum? Hvað er með ásum? Gnýr allur Jötunheimur, æsir eru á þingi; stynja dvergar fyr steindyrum, veggbergs vísir. Vitið þér enn - eða hvað?" Úr Völuspá
Sumarið 2009 verður röð listviðburða, málþing, námskeið, fyrirlestrar og fleiri viðburðir þar sem leitað er svara við spurningu völvunnar. Á sumarsólstöðum 2010 er stefnt að alþjóðlegri ráðstefnu um gyðjuna í Hofi menningarhúsi á Akureyri.
Við Mardallarkonur erum allar í fullu fjöri og hver um sig að vinna í sínu, sundur og saman. Framundan er gyðjuráðstefna sem haldin verður í Hofi Akureyri 2010 og fram að þeim tíma fer fram undirbúningur : ráðstefna, listviðburðir og alls konar uppákomur.
Þá verður kátt í höllinni!
2. - 4. maí 2008 Öngulsstöðum í Eyjafjarðarsveit
Gefðu sjálfri þér gjöf!
Rýndu í ræturnar, nærðu sálina og njóttu lífsins þessa helgi í hópi magnaðra kvenna
Á þessu námskeiði eru fornsögur okkar, goðsagnir og þjóðsögur notaðar sem speglar fyrir lífið og sjálfsmyndina. Um leið og við rifjum upp sagnaarfinn fáum við þær Freyju, Brynhildi, Kráku, Melkorku, Skapanornirnar, valkyrjuna, álfkonuna, tröllkonuna og fleiri magnaðar gyðjur og konur til að leiðbeina okkur og bregða ljósi á sjálfar okkur og umhverfið. Við vinnum með drauma, hugleiðum, hreyfum okkur, nærum líkama og sál í yndislegu umhverfi og njótum lífsins.
Leiðbeinandi er: Valgerður H. Bjarnadóttir
Valgerður er félagsráðgjafi, með framhaldsnám í draumafræðum, helgum kvennafræðum, menningarsögu og trúarheimspeki. Hún hefur unnið að ráðgjöf og fræðslu með áherslu á menningarsögu, trú, drauma og sjálfsstyrkingu kvenna í áratugi og rekur fyrirtækið Vanadísi.
Námskeiðið hefst með kvöldverði föstudaginn 2. maí kl.19 og lýkur á sunnudag kl.14
Verð fyrir námskeiðið, gómsætar máltíðir og gistingu í tvær nætur kr. 40.000.-
Sýningin/ gjörningurinn "Hreingjörningur í lit", unninn og fluttur af Önnu Richardsdóttur dansara og gjörningalistakonu, Brynhildi Kristinsdóttur og Jónu Hlíf Halldórsdóttur myndlistakonum, Kristjáni Edelstein og Wolfgang Sahr tónlistamönnum ásamt Þorbjörgu Halldórsdóttur leikmyndahönnuði verður flutt í bílageymslu við Norðurorku, Rangárvöllum, laugardagskvöldið 12.
apríl klukkan 20:30.
Verkið er samið af Önnu Richardsdóttur en í náinni samvinnu við listafólkið. Það fjallar um hvernig lífið setur mismunandi liti á hinar mismunandi persónur tilverunnar, t.d. fjallar það um Gotthildi, stolta og smart, svífandi á skýi eigin hroka og fall hennar við það að komast í snertingu við liti lífsins. Einnig kynnumst við Blóthildi, en hún fórnar því dýrmætasta sem hún á og tapar öllu. Tilveran býður henni þó upp á heilun.
Anna flytur verkið innan hugmyndaramma en margt er spunnið á staðnum. Kristján Edelstein tónlistarmaður vinnur svipað að tónskúlptúrnum, hann vinnur eftir hugmyndaramma en gefur sér frelsi til spuna og þar með túlkunar sem verður til á staðnum. Leikmynd Þorbjargar Halldórsdóttur er uppspretta tónverksins að hluta og Anna notar hana til framkvæmda í verkinu. Þannig er allt verkið samvinna listamannanna sem að því koma.
Myndlistasýningin eru myndir eða innsetningar um hreingjörninga eftir fólk og listamenn alls staðar að úr heiminum sem eru þátttakendur í Alheimshreingjörningi í 10 eða færri ár. Flest hafa sent inn verk áður og nokkrir eru frá Akureyri.
RSS
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.